hits counter

أوقات تكره فيها حياتك

Mr.3B

True Gamer
- لما أكون بالجامعة وفي المحاضرة ويكون حرررررررررررررررررررررر ورطوبة داخل الصف من المطر .. والطلاب ما يبون المكيف يشتغل وأنا بموت من الحر .. ويكتفون بفتح الشبابيك .. يا الهي مدري وش قصتهم هذول اليابانيين

- لما تكون طالع وما معك مظلة لأن سامع بالكاست ان نسبة هطول المطر 20 الى 30 بالمية .. وتمطر .. بسبب ذي الحركة الآن أمتلك الدرازن والدرازن من المظلات .. والي يقهر أكثر اني ما أشتري وحدة الا بعد ما أتروش .. يعني ما استفدت شي

- لما تكون بمحاضرة .. والوقت يمر بشويييييييييييييييييش .. لدرجة انك كل ما تحس ان راح جزء كبير من الحصة وتتوقع انك الحين لما بطالع الساعة بتكتشف انه باقي 10 أو شي من هذا القبيل وبعدين تنصدم انه ما مرة الا 5 دقايق من آخر مرة شيكت فيها على الساعة .. وتستمر على هذي الوضعية الين نهاية المحاضرة الأخيرة لك في هذا اليوم التعيس المليء بالمحاضرات

- لما تكون جالسة تمطر في هذا اليوم وتركب قطار زحمة ما لك مكان تحط رجلك فيه .. وتتزاحم الأمم للركوب في القطار .. وكل واحد مبلل ومعرق وروايح وقلق ويدفون بعض لركوب قطار النجاة على غفلة .. وتقعد في القطار فترة لا تقل عن نص ساعة واقف الين ما توصل محطتك الي تبيها .. طبعًا نص ساعة في أجمل وأحلى الحالات .. بالعادة ساعة الى ساعة وعشر دقائق .. أتوقع لو اني من قصار القامة كان فكرت جديًا باني أنتحر في مثل هذي اللحظات

- لما تكون نايم .. وفي أحلى نومة .. وبراد ومتلحف .. وفجأة بعز النوم .. بوسط الليل .. ما يقارب الساعة 2 بالليل .. تحس انك لازم تروح الحمام .. وتتصارع مع الحشْره هذي على أمل انها تروح .. وكل ما لها تزيد .. وتزيد حاجتك للذهاب للحمام .. ولازم تقطع نومتك العسل عشان تروح الحمام ولا بتسويها بفراشك .. وبعدين تقوم عينك ما تبصر شي .. وتاكلك كم جدار وكم حافة طاولة وانت بطريقك للحمام .. ما يمديك تكلع من الحمام الا وانت مصحصح وما فيك نوم ولا تقدر ترجع تنام




هذا ما هو ليس الا البعض القليل من الأوقات الي أكره فيها حياتي .. بزيد البعض منها لاحقًا


بس بالنسبة لكم .. وش الاوقات الي تكره فيها حياتكم ؟؟
 

Id

True Gamer
اكثر وقت أكره في حياتي لما اعقد أمال كبيرة على اشياء وتكون نسبة نجاحها 99.99% وفجأة الـ 0.001 % ينجح وأنا اروح فيها ...

اكره لما اروح الجامعه في الشتاء و القاهم مشغليين مكيفات ..

اكره ثم اكره ثم اكره لما اروح تشيليز وما القا عندهم "مولتن ماونتن" كيك ...
 

m7tram

True Gamer
- لما اكون قاعد مع واحد ويتطلب الوضع اني " أجامله كل الوقت " , آآآآآآآآآآخ احس اني بنفجر وقتها .

- لما أكون شاري شغله جديده ومستانس فيها لآخر درجه وتطلع لي مشاكل بالمنتج الي شاريه .

- مرات أكون في قمه الوناسه وانا ألعب أو وانا قاعد على النت او اشوف فيلم .. الخ , يجني أبوي أو أمي ويقولون لي ود فلانه السوق , أكررررررره حياتي لان ادري ان 5 - 7 ساعات راح تروح من وقتي بس ماشي وشايل أغراض وفراره مالها معنى .
 

Justice

True Gamer
لما تكون نايم .. وفي أحلى نومة .. وبراد ومتلحف .. وفجأة بعز النوم .. بوسط الليل .. ما يقارب الساعة 2 بالليل .. تحس انك لازم تروح الحمام .. وتتصارع مع الحشْره هذي على أمل انها تروح .. وكل ما لها تزيد .. وتزيد حاجتك للذهاب للحمام .. ولازم تقطع نومتك العسل عشان تروح الحمام ولا بتسويها بفراشك .. وبعدين تقوم عينك ما تبصر شي .. وتاكلك كم جدار وكم حافة طاولة وانت بطريقك للحمام .. ما يمديك تكلع من الحمام الا وانت مصحصح وما فيك نوم ولا تقدر ترجع تنام
صراحة هذي في الصميم من جد من جد اكررره شيئ وبذات حق شخص يحب النوم مثلي ><
تغث
 

the obscure

True Gamer
ايام المدرسه لما تكون في الإجازه الصيفيه،وتروح الإجازه عليك بسرعه وما تدري الا واليوم الثاني دراسه.
والله هالأيام كل ما اذكرها احمد الله اني انتهيت من هالمرض،هالوقت من ابشع الأوقات في حياتي.
 

iCon

True Gamer
لما تكون نايم .. وفي أحلى نومة .. وبراد ومتلحف .. وفجأة بعز النوم .. بوسط الليل .. ما يقارب الساعة 2 بالليل .. تحس انك لازم تروح الحمام .. وتتصارع مع الحشْره هذي على أمل انها تروح .. وكل ما لها تزيد .. وتزيد حاجتك للذهاب للحمام .. ولازم تقطع نومتك العسل عشان تروح الحمام ولا بتسويها بفراشك .. وبعدين تقوم عينك ما تبصر شي .. وتاكلك كم جدار وكم حافة طاولة وانت بطريقك للحمام .. ما يمديك تكلع من الحمام الا وانت مصحصح وما فيك نوم ولا تقدر ترجع تنام
تصير لي يوميا :( :(

- لما تطلع مشوار و تكون مستعجل و تلقى واحد ماسك الخط اليسار و يسوق لك 60 !!!
- لما ما تحس بالجوع ابدا و اول ما تحط راسك تبى تنام .. تحس بجوع مب طبيعي و لازم تطلع تاخذ لك اكل و انته اصلا مب قادر تتحرك من التعب.
- لما تكون مندمج في فيلم او مسلسل او جيم و فجاه يرن التليفون و يخرب عليك الجو ( علشان جيه تليفوني 24 ساعه علي السيلنت )
- لما تروح الجمعيه علشان تشتري غرض واحد و تلقى 100 واحد عند الكاشير و المحاسب يكون بعده تحت التدريب.
 

Khalid-S

Executive Member
قبل السفر لامريكا بيوم. اكره فيها حياتي.
 

G7Ga7

True Gamer
اكره ثم اكره ثم اكره لما اروح تشيليز وما القا عندهم "مولتن ماونتن" كيك ...

ههههههههه من جد xD

--

- اكره حياتي لما يجيني واحد ماعنده سالفة يتفلسف .. خاصة ان كان هالشيء انا ملم به .
- لما اشغل الـCD في السيارة , واسمع لحن عجيييييب .. وفجأة ينقطع علي بسبب ان السي دي بلاير حق السيارة مضروب , أو الـCD نفسه ..
-اذا أكلت على الغداء كثثثييير , وحسيت بالتخمة القاتلة .
- أول ما أقوم من قيلولة الظهر ( وع أحس الدنيا كلها فوق راسي -_-)
- اذا لعبت مع "بزران" في الاكس بوكس لايف ..
- لما يجيني واحد في الجامعة يقولي عادي اخذ النوتس حقتك أصورها !
- لما انام على الكنبة , واقوم وانا وسط نومي عشان جسمي يعورني بسبب ضيق الكنبة ..
- لما انام في وسط فيلم اوسكاري ( فيلم نو كونتري فور اولد مين شفته على ثلاث دفعات :( ) btw, أتحدى واحد فيكم يعرف كاراكتر في التلفزيون الامريكي نفس وضعي مع الافلام هذي :p !?
- لما أقوم واكتشف اني متأخر/فوّت علي أول كلاس بالجامعة .
- لما ألعب لعبة مالها هدف أو قصة .
- لما أطلب من ماكدونلدز ساندويتش , ويجيبلي شي جاهز له 15 دقيقة .
- اذا شغلت مكيف السيارة على العالي , ويطلع علي غبار ... xD

لول .. بس الحياة حلوة :p
 

pacino

True Gamer
اكره حياتي في بداية كل سمستر..ما ادري ليش..تحوشني فترة اسبوع إلى اسبوع ونص اقعد انفس فيها واصير مزاجي وعصبي وضايق خلقي!! إلى ان اتعود على الدراسه ويرجع الوضع كما كان

اكره حياتي اذا كنت طالع مشوار ومتزهب ولابس وبالطريق...ينكب علي شيء او توسخ ملابسي

اكره حياتي اذا كنت ادرس الفيزكس وانا موفاهم شيء..

اكره حياتي اذا الدكتور ما يعرف يشرح مثل الدكاتره الباقيين

اكره حياتي اذا كنت طالع للجامعه وحاسب حساب الوقت بالضبط...فجأه تصير زحمه

اكرررررررررررررررررررررررررررررررره حياتي اذا كنت قاعد ادرس طوووووووول اليوم والنوم طالع من عيوني ومأذيني ومو عارف ادرس من...ولمن ابي اجي احط راسي وانام ...اقعد اتقلب ساعتين علشان انام..انواع القهر
 

Colorization

True Gamer
- لما تكون بمحاضرة .. والوقت يمر بشويييييييييييييييييش .. لدرجة انك كل ما تحس ان راح جزء كبير من الحصة وتتوقع انك الحين لما بطالع الساعة بتكتشف انه باقي 10 أو شي من هذا القبيل وبعدين تنصدم انه ما مرة الا 5 دقايق من آخر مرة شيكت فيها على الساعة .. وتستمر على هذي الوضعية الين نهاية المحاضرة الأخيرة لك في هذا اليوم التعيس المليء بالمحاضرات
this. الشي الوحيد (تقريبا) اللي أكرهه بالدنيا.

ايضا أول ما اقوم من النوم. جسمي كله مكسر وأحس إني مسخن (من كثر النوم لول). بس الشعور يتلاشى اول ما اشرب نسكافيه.
 

Lone Wolf

Banned
- لما اكون قاعد العب اون لاين والحماس +10000 ويقوم يفصل علي -_-"

- لما اكون نايم احلى نومه واسمع صوت ناس تشتغل بره فالشارع!

- اكره حياتي لما يجيني واحد يتفلسف في متل جير وهو مايدري وين الله حاطه!

- اكره حياتي لما ماسوي شي فالصف والإستاذ يظلمني انا والله اطرطع ماحب الظلم انا

- اكره حياتي لما العب اون لاين وفي لاق مب طبيعي لا وبعدها يفصل!!
 

G7Ga7

True Gamer
ايضا أول ما اقوم من النوم. جسمي كله مكسر وأحس إني مسخن (من كثر النوم لول). بس الشعور يتلاشى اول ما اشرب نسكافيه

والي ما يحب النسكافيه .. وش يسوي :(
 

Double T

True Gamer
اكره ثم اكره ثم اكره لما اروح تشيليز وما القا عندهم "مولتن ماونتن" كيك ...
يا عيني عليك .. الرياض جات فترة شهر او اكثر ما فيه خخخخ

- اكره ما عليه يوم اخطط لأكثر من حاجة و كلهم يعتمدون على شي واحد و ما يصير ذا الشي .. تتلخبط كل مخططاتي ::mad::
 

Dark soul

Hardcore Gamer
اذا كانت ساعة المدرس متقدمة عن عن باقي الساعات :annoyed:
 

Lunar Poet

True Gamer
ألحين
icon8.gif
!
 

Kaze

Hardcore Gamer
- اكره حياتي لما يجيني واحد يتفلسف في متل جير وهو مايدري وين الله حاطه!
الصراحة هذي اهم نقطة ... ممكن اكره فيها حياتي و صاحبها معاها P:

اكره شيء لما يسالك واحد سؤال و ما تقدر تجاوبه و المفروض انك تكون ملم بهل الشيء ( المفروض )
 

Knightmare

Hardcore Gamer
موضوع حلو


أكره أصحى للدوام اذا كنت سهران طول الليل <<<<طيب مين قالك تسهر :nerd:

أكره لما اعرف ان الامتحانات قررربت :surprised:

----------------------------------------------

بس بغيت اذكركم مهما تمر بأوقات عصيبة مايجوز انك تسب الوقت. للأسف نسمع كثير من الناس يستخدمون الفاظ مثل: الله يلعن الساعة اللي عرفتك فيها أو يلعن الوقت اللي فكرت اسوي كذا و كذا. وطبعا هذا ما يجوز:

عن أبي هريرة رضي الله عنه قال : قال رسول الله - صلى الله عليه وسلم - : ( قال الله عز وجل : يؤذيني ابن آدم يسب الدهر ، وأنا الدهر بيدي الأمر ، أقلب الليل والنهار ) .

تخريج الحديث

الحديث أخرجه البخاري و مسلم .

معاني المفردات

السب : الشتم أو التقبيح والذم .

الدهر : الوقت والزمان .

يؤذيني : أي ينسب إليَّ ما لا يليق بي .

وأنا الدَّهر : أنا ملك الدهر ومصرفه ومقلبه .
 

persona

True Gamer
تبي تقضي وقت ممتع بالويك اند وتاخذ طريق مختصر للمكان اللي بتروحله وتلقى الطريق المختصر اللي خذيته زحمه :laugh::
 

Mr.3B

True Gamer
تبي تقضي وقت ممتع بالويك اند وتاخذ طريق مختصر للمكان اللي بتروحله وتلقى الطريق المختصر اللي خذيته زحمه :laugh::

ما تكره حياتك في أيش متعلق بمدير جامعتكم ؟؟ .. لول اشتقت لسوالفه :xd:
 

persona

True Gamer
^ شالوه بسبب تجاوزات ماليه من سنه :laugh::
 

Tomb raider

True Gamer
- لما يضيع عندك شي وانته كل يوم تشوفه الا لما تحتاجه يضيع..
- لما واحد يقعد يقولي كلام وهو ميت من الضحك وانا اشوفه ما يضحكني "بالعكس احس ان ضغطي يرتفع"
-لما العب لعبه وموصل ماكن بعيد وانا مو مسوي Save
- لما الدكتور ما يفهم شي .
- لما اكلم احد من ربعي وفجأه يقول كلم اخوي الصغير "غالبا يكونBaby" المشكله ما اعرف شو اقوله -_-"
 

DeaDMaN

True Gamer
اممممممم ..

لما أتقلب على السرير وقت طويل احاول انام ..

لما أفكر في أفكار لEssay او لPresentation عن موضوع ممل و في وقت ضيق

لما اضطر اختبر اختبار طويل ..

لما اضطر اجامل أي أحد..

لما أشاهد فلم بايخ او نهايته تقهر ..

لما أخطط لأسوأ الحالات والنتيجة تكون أسوأ p=

لما اسافر او لما احد من اصحابي يسافر
 

Majeed

Warrior of Liberation
- لما اكون قاعد مع واحد ويتطلب الوضع اني " أجامله كل الوقت " , آآآآآآآآآآخ احس اني بنفجر وقتها .

- لما أكون شاري شغله جديده ومستانس فيها لآخر درجه وتطلع لي مشاكل بالمنتج الي شاريه .

- مرات أكون في قمه الوناسه وانا ألعب أو وانا قاعد على النت او اشوف فيلم .. الخ , يجني أبوي أو أمي ويقولون لي ود فلانه السوق , أكررررررره حياتي لان ادري ان 5 - 7 ساعات راح تروح من وقتي بس ماشي وشايل أغراض وفراره مالها معنى .

لول محترم انت عايش في جلدي :laugh:: :( ،، نفس الي يكرهني بحياتي بالإنش ،،

+ أكره حياتي إذا كانت عندي محاضرة بوقت الغدا ( صارت لي سمسترين وهالصيفي :( )
أكره حياتي ليلة اختبار الرياضيات او الفيزياء :( ،،
 

BioMario

مصمم
أكره شي عندي يوم أتكلم مع لربعي على الماسنجر او أكتب رد في المنتدى وواحد يكون جنبي يطالع شو أكتب
 

Zero_IYAD

True Gamer
- لما تكون بمحاضرة .. والوقت يمر بشويييييييييييييييييش .. لدرجة انك كل ما تحس ان راح جزء كبير من الحصة وتتوقع انك الحين لما بطالع الساعة بتكتشف انه باقي 10 أو شي من هذا القبيل وبعدين تنصدم انه ما مرة الا 5 دقايق من آخر مرة شيكت فيها على الساعة .. وتستمر على هذي الوضعية الين نهاية المحاضرة الأخيرة لك في هذا اليوم التعيس المليء بالمحاضرات
آآآآآخ T_T
أمر بهالحالة يوميا .
أكره الفصل الصيفي و محاضرات أم ساعة >_<

- لما تكون نايم .. وفي أحلى نومة .. وبراد ومتلحف .. وفجأة بعز النوم .. بوسط الليل .. ما يقارب الساعة 2 بالليل .. تحس انك لازم تروح الحمام .. وتتصارع مع الحشْره هذي على أمل انها تروح .. وكل ما لها تزيد .. وتزيد حاجتك للذهاب للحمام .. ولازم تقطع نومتك العسل عشان تروح الحمام ولا بتسويها بفراشك .. وبعدين تقوم عينك ما تبصر شي .. وتاكلك كم جدار وكم حافة طاولة وانت بطريقك للحمام .. ما يمديك تكلع من الحمام الا وانت مصحصح وما فيك نوم ولا تقدر ترجع تنام
لول
أيام المعاناة , لما كنت أذاكر من الـ12 الى الـ9 صباحا , ثم أصحى أصلي الظهر و أرجع أكمل نومتي , ثم العصر , ثم المغرب , ثم أصحى على العشاء لبداية يوم جديد .

الطب = المعاناة -_-

- ليلة قبل الامتجان , خاصة بامتحانات الـSystems , يكون الـAdrenaline واصل مليون و مالك نايم من يومين بس مو قادر تنام من التوتر .

- ليلة قبل السفر لدوام الفصل الجديد , كيف مرت الاجازة و أنا عند أهلي ما بعرف -_-

- لما يجيني وحدة في الجامعة يقولي عادي اخذ النوتس حقتك أصورها !
أو الألعن يلي تجيني قبل بداية الاختبار بدقيقة تقولي ممكن أجلس جنبك و تغششني !!
 

Tomb raider

True Gamer
أكره شي عندي يوم أتكلم مع لربعي على الماسنجر او أكتب رد في المنتدى وواحد يكون جنبي يطالع شو أكتب

علشان يشوف اسلوب ردك P: الصواريخ والواوات والدمار الشامل P: خخخخخخ
 

Zero

فريق الأنمي
الشيء الوحيد اللي يضاقيني في هالدنيا هو : إذا كنت اتمنى شيء وما أقدر أحصل عليه خصوصا لما يكون متعلق بالجيمز بشكل عام واللي هي تقريبا اهتمامي الوحيد -____-" ، شيء يضايق بشكل ما حد يتصوره ! .

أحس خلاص يائس من الحياة ولكن غير هذا الشيء ما في شي يضاقيني .
 

Gon freeces

True Gamer
الشيء الوحيد اللي يضاقيني في هالدنيا هو : إذا كنت اتمنى شيء وما أقدر أحصل عليه خصوصا لما يكون متعلق بالجيمز بشكل عام واللي هي تقريبا اهتمامي الوحيد -____-" ، شيء يضايق بشكل ما حد يتصوره ! .

أحس خلاص يائس من الحياة ولكن غير هذا الشيء ما في شي يضاقيني .
من جد ! خصوصًا إني ساكن بمدينة ما يبيعوا ألعاب وي \دي اس ,و يبيعوا ألعاب بي اس 2 تقيلدية (اليوم شفت عندهم ديسجايا !)
 
التعديل الأخير:
أعلى