منتديات تروجيمنج

بس هنالك عده امور خلتني فعلاً خلاص اقرر ما اشارك ، و اولهم حذف موضوعي الاخير (وليس الباند بعينه !) .. مع اني ما ابي اتناقش بهالامر ، لانه موب اول مره يتكرر هالامر مع انه الدعوة مزح و للفرفشه ، بس بديت احس بانه الحذف كا نوع من عدم التقدير لجهودي (حتى لو كان الامر عشوائي و الموضوع عباره عن كم سطر) ..

و تجاهلت الامر لاكثر من مره من غير ما اجيب طاري ، بس الحادثه الاخيرة خلتني اخذ موقف شوي (مع عدم الخوض بالتفاصيل) و اسأل نفسي هالسؤال ، ( هل انا جالس اضيع وقتي بالمنتدى ؟)

امر ثاني ، أمر إصراري على جوائز الأعضاء ... لاني تعبت من كثر ما جبت طاري الاعضاء و دورهم بموقع تروجيمنج .. بس ما قاعد اشوف احد مهتم لهالشي ؟ .. و خلاني أسأل , هل الشباب فعلاً يشوفون نفسهم بإنهم ما يستحقون هالشي ( حتى لو كانوا جيل جديد، لانه لولاهم لما استمر المنتدى ، ألي هو اساس الموقع ) .. أم انا مرة اخرى جالس اضيع وقتي بالمنتدى ؟

امر ثالث ، موضوع كرسي الإعتراف حق البسيمي ألي قبل اسبوع .. معقولة محد سأل البسيمي ، ليش هو يوزع جوائز لناس عشوائيين باليوتيوب او يمكن بتويتر (ماني متأكد) فقط لانهم سوا لايك .. و ما يوزع بالمنتدى ؟ ، فهالنقطه مرتبطه بالنقطه الثانية ... و خلتني احس بإحساس عدم تقدير الاعضاء لحقهم و لنفسهم و بنفس الوقت لعدم تقدير البسيمي للمنتدى نفسه و لأعضاءه .. و اسأل مره اخرى ، هل انا جالس اضيع وقتي هنا بالمنتدى ؟

و الامر الرابع ، هو قله تفاعل الاعضاء بموضوع التصويت ... ليه التفاعل قليل لهالدرجه ؟ ليه مافي تقدير للشباب فيما بينهم و ليه مافي مشاركه و تشجيع لبعضهم البعض؟ ، علشان الناس ما تحس انه وقتهم ضايع هنا بالمنتدى و انه في على الاقل تقدير شفهي و ليس مادي لجهودهم... علشان هالشي بيخليهم يبذلون اكثر و يستمر المنتدى !

بالنسبة لي اشوف بانه هالشي مُحزن ، و إن دل بيدل على انه المنتدى ناطره مستقبل مُظلم ، و قريب جداً اكثر مما ظننت ! .. لانه اذا الاعضاء نفسهم ما شاركوا بالموضوع الموجه لهم ، فهل هم و انا جالسين نضيع وقت هنا ؟ ( مع اني كتبت رد هناك و وضحت نقطتي ليش ما ابي اشارك قبل لا يتم حذف ردي ، بس بالاخير اليوم شاركت، كا تقدير للجهود المبذولة ألي تستاهل الاشاده )

امر خامس ، الباند خلاني فعلاً اوقف و اعيد تفكيري بالوقت ألي كنت جالس اقضيه هنا ؟ .. فا على الرغم من قله ردودي المُثرية و اغلبها مالها علاقه او تفيد بالنقاش لانه الغرض منها هو الضحك ... لكن الوقت ألي اقضيه بقراءة كل رد بكل موضوع و التفكير بالرد عليه برد ساخر غير مؤذي و البحث بالنت عن صور لربما تساعد ببناء الرد او عمل generated meme .. فا كل هذا ياخذ من وقتي !!

لانه المنتدى ياخذ وقتي اكثر من اي برنامج تواصل اجتماعي اخر .. و يكفيك بانه اول ما اقعد من النوم، اول شي اسويه اول ما اقعد من النوم ، هو تصفح المنتدى ! .. فا مثل ما الناس مدمنه على الانستجرام و السناب بشكل مبالغ به .. فا المنتدى كان هو إدماني الاكبر ..

بس الباند الاخير، خفف هالادمان و خلاني اعيد ترتيباتي و خلاني ألتفت لاموري الاخرى زي هوايات اللعب نفسها و صرت ألعب.. و صرت حتى اركز مع عائلتي و اتفاعل معاهم بالواقع، او اشارك اكثر بالسناب شات كا مثال اخر .. مع ال٥٠ شخص ألي اعرفهم معرفه شخصيه بسناباتي و صار في تواصل بيني و بينهم لاني و اخيراً قدرت ألقي الوقت لذلك ! و ما خلاني أتساءل ، هل انا جالس اضيع وقتي مع الناس البرايفت ألي تتابعني؟

فهذي هي الامور الاساسية ألي خلتني اخذ قرار تخفيف مشاركاتي و الاكتفاء بالمتابعه و القراءة فقط ... لانه زي ما قلت المنتدى يبقى شي احب اسويه يومياً ، بس الوقت ألي كنت اقضيه بجميع الامور ألي كنت اسويها بالمنتدى (ردود و أحزاب .. الخ )، شفت انه يمديني استغلها بوقت ثاني.

يمكن انا كررت جمله ( هل جالس اضيع وقتي بالمنتدى؟ ) .. و لربما هالشي يعطيك الاحساس بإني و كأنما ردودي الثمينه مغرقه المنتدى و المنتدى بيموت من غيري ، حالي حال حسين ...

بل انا نفسي اعترف و اكرر بانه ردودي اساساً ما منها فايدة و بلا هدف و لا تحرك النقاش شعره وحده ! ...

بل السؤال ذاته هو صادر مني و متجه لي ... وانا ماني جالس اسالك انت او اي شخص اخر و اطالبه بالرد علي .. بل كل ما في الامر هو التفكير بصوت عالي لما دار براسي بفترة الباند و شرحه هنا !

و الشباب ألي حابين تواجدي ... و احزنهم القرارات ألي اتخذتها ، فا هم اخوة اعزاء .. و هالشي يسعدني فوق ما يتصورون و سبب استمراري طول هالسنين هو انتم .. و حشا لله، ماني شايف نفسي عليهم لاني متكبر عليهم و إني موب ماخذ كلامهم بعين الاعتبار .. بل بالعكس ، انا كل تواجدي هنا هو عشانهم ، و سبب زياره دوله لكل واحد منهم ، هو علشان ألتقيهم و اتعرف عليهم بالواقع !! .. وانت يا عبدالله و الادارة كلهم مشمولين

بس زي ما قلت ، انا ماني رايح للأبد بل باقي للقراءة فقط .. و للي حابب يتواصل معاي, ملفي هنا موجود .. و سنابي أيضاً موجود s3rorh .. بما إني رجعت له بشكل شبه يومي و محتواي جداً بعيد عن ( اشغل اغنيه رومنسية عراقية ولا شيله و ماسك سكان السيارة بإيد و اصور بإيدي الثانية) .. وهذا خيار اخر للي يحب يشوفني و يتابعني اكثر .. فا الت اصل بيبقى موجود بإذن الله

و سلامتكم جميعاً و معذرة على الاطالة و شكراً للقراءة

اعتذر لمسح تعليقاتك يا @abdullah-kh بس ما حبيت يصير في تداخل ، و انك ترد علي قبل لا اخلص كلامي كله .. المايك لك ... و رجاءاً شوفو حل لسالفه ٤٢٠ حرف

نحن الادارة جهة تطوعية ما لنا نسبة أرباح من المنتدى، ما نقدر نقدح على كيفنا ونخلي المسابقة بعوائد مالية، الشئ يصير فوق مهمتنا، المشكلة معاك أنك لحوح وتطلب منا فوق طاقتنا ولا الأسوء تحرجنا مع المدير الكبير، وتقدر بسهولة تروح ملفه (اللي مفتوح)، وتطلب منه ذلك، ترى ما هي اختراع صاروخ.

الاشياء المادية مش بالسهولة التي تتخيلها لازم علم صاحب الموقع، وأسلوبك غثيث حيل ويفشلنا صراحة. ترى للحين منحرج من سالفة "لازم المشرفين يحصلوا جوائز" اللي ما أستشرت أحد وكذا ركبت براسك وأحرجتنا.

بغض النظر عن True Gaming كلامي عام.. نعم شيء يغبن أن الجوائز المادية صارت عشوائية و الربح مادي للي يملى المسبح كاتشب (&) و المنتديات طول عمرها الي يتعب فيها ما يحصل شيء هذا شيء تعودنا عليه للأسف.. المشرفين ما بيدهم شيء اصلا.. عملهم تطوع/شغف بحت.. و المنتدى ما يشكل ذلك الربح اصلا للموقع للأسف.. المهم خلاص تعودنا هذا حال المنتديات (&)

باك ... و معذرة على التأخر بالرد, الأيام ألي فاتت كانت فل كرف -_-

المهم ... عزيزي عبدالله ... نرجع و نقول ليه تتخيل أمور ما حصلت و تحط نفسك و كأنما انت محور الموضوع حقي ؟ و تكلمني كأنما أنا اطلب الجائزة منك تحديداً ؟ أو من المشرفين الباقين ؟ و اذا على طاري البيسيمي ... انت متأكد بأنك تقرأ مواضيعي قبل لا تحذفهم ؟ ولا الوضع صار عادة كده ؟ .. صوره الموضوع

وسبب جعل هالشي عام و ليس بالملف الخاص ... هو لأني ابي الناس تعرف ايش قاعد يصير .. و ألي يشوف نفسه يستاهل و بأنه الجائزة قليله بحقه .. فله كامل الحرية ينضم معاي ... يعني المسألة كانت لتجميع الاصوات و الاراء لا اكثر ... من غير ما اسبب اي احراج لأحد .. لأني عارف 100% انكم تشتغلون هنا ببلااااااش