شي اسمه ملل بانساه هذا الصيف.. الله يلعن ذي الكلمة ياشيخ طفشت من كثر ما اقولها طوال الترمين الماضيين .. والله من الي شفته ما ابغى اضيع ولا دقيقة في هذي الإجازة .. يعني حتى نوم ماصرت ابغى انام كثير صرت انام بين 4 - 5 ساعات يوميا فقط كحد أقصى..
بالنسبة لي.. هذا الصيف راح يكون ان شاء الله شعلة من النشاط والانبساط .. سواء فيديو جيمز .. أفلام .. أعمال شغب في الشوارع.. سهر.. الطقطقة على النت .. قراءة الكتب واكمال ناروتو " هو هو "
بالنسبة للفيديو جيمز .. انا وراي أطنان من الألعاب لسة ماخلصتها هذا غير الي راح تصدر..أيضا عندي الPSP رفيقي الدائم بلا شك .. ووراي أيضا الننتندو DS يعني مكتبة الألعاب بتكون متكاملة عندي ومالي عذر إني أقول اني طفشان .. يعني من هذي الناحية أنا متطمن تماما.
الأفلام.. كثير أفلام بتجي في الصيف وكثر أفلام فوتها وودي أشوفها .. يعني من هذي الناحية برضو انا متطمن.
بالنسبة لأعمال الشغب.. فاحنا عاد عندنا عادة سنوية مع أولاد خالتي.. كل سنة في الصيف لازم نسوي مغامرة وسبحان الله في كل مغامرة ربك يلطف ونطلع منها زي الشعرة من العجينة
اتوقع هذا الصيف في مغامرة لن تنسى أبدا !!
السهر.. امممم رفيقي الدائم أيام الإجازات .. وحلاوة الإجازة فيه أصلا .. يعني تخيلوا بالله واحد طول السنة ماسك نظام معين في النوم والقيام بسبب الدراسة ويجي الصيف وهو متمسك فيه .. بصراحة هذا يسمح لي اقوله انت حمار هههههههه مع احترامي.. كيف يبغى يتستمتع بالإجازة بدون سهر !! الشاهد إن الي مايسهر مايعرف طعم الإجازة ابدا.
الطقطقة على النت .. اممممم راح تكون مثل الأيام العادية يعني ماشاء الله ترو جمينج مفتوح.. يمكن في شباب كثيرين بيسافروا لكن اعتقد المنتىد راح يظل نشيط.. وهذا شي جيد
قراءة الكتب.. اممممم.. ياسلام.. بالنسبة لي انا ابتعد تماما عن الكتب السطحية والي مالها فائدة ابدا او الي تكون قصص بلا هدف معين.. تعجبني كتب الأيدولوجيا.. وشي جيد انك تتعرف أكثر على ثقافات مختلفة ... انا تعجبني الكتب الي يبغالها مخ وزنه ثقيل حتى يستوعبها..كتب الفلسفة مثلا.. أيضا أحب أقرأ بعض الأحيان عن كتب الشعر الجاهلي أما الحديث انسى .. في كتب كثيرة خلصتها وودي أعيد أقراها.. مثلا كتاب " حماري قال لي " لتوفيق الحكيم .. أيضا وراي كتاب نهاية التاريخ للمفكر الأمريكي فرانسيس فوكوياما الي سوى ضجة كبيرة والي يتحدث عن نهاية العالم بانتصار النموذج الأمريكي الليبرالي.. مع انه موضوعات أطروحته هذي مستفزة حيث كأنه يصف الإسلام بالفاشية الجديدة والي يوافق فيها تغيير الإسلام من نموذجه الفعلي إلى نوذج يطابق وجهات النظر الغربية .. أنا كاره فوكويما هذا بس ابقرا كتابه من باب " اعرف عدوك ".
الشاهد برضو من ناحية الكتب انا متطمن تمام..
اما ناروتو .. ياسلام على الحب الكبير .. أخيرا جا الوقت الي اكمل فيه المسلسل !!
غير كذة في مشاريع أخرى كثيرة ماوضحت أمامي.. يعني مثلا أفكر أدخل دورة لغة إنجليزية حتى اعدي اختبار التوفل ونصير بلابل انجليزي
او أي دورة ثانية .. أيضا في كذة شخص عزيز جدا علينا راح يتشرفوا بزيارة جدة ان شاء الله ..عاد هذي لحالها بالصيف كله هههههههه ..
طبعا فكرة تسجيل ترم صيفي كانت في مخي لين أمس بس قسم بالله NO WAY هذا صيف. مرة واحدة في السنة ليش اضيعه .. والله تسري الجامعة والي سوى الجامعة والي يدرس في الجامعة ويسري مدير الجامعة ويسروا كل الي شغالين فيها .. سحقا لكم كلكم..
طبعا مكة.. امممم.. بما أني قعدت فيها طول الترمين الماضيين غالب الوقت لكن الظاهر ماراح اقضي غالب وقتي فيها.. اصلا ايش عندي فيها.. أصحاب وكل واحد مسري ولا أحد بيسأل كل واحد مسوي لي فيها ثقيل .. عاد الي مايسال احنا ليش نسأل عليه .. صح والا لا ؟
نفسي نفسي هذي الحياة يبووووووويا.. أنا أصلا اتعلمت اني اكون بعين حمراء وارمي الطيبة وراء ظهري انا اصلا الطيبة ماجابت لي إلا عوار الراس وكل واحد صار يطلع على ظهري تقولوا بغل أكرمكم الله..
لول اعتقد بعد هذا كله والي مستخبي ان شاء الله راح تكون إجازة صيفية مثالية... طز في أي واحد يحاول يعكر علي صفو الإجازة .. سحفا له ..والله لا أدمر أي واحد يخرب علي الإجازة .. سأضربه بيد مو من حديد بل من فولاذ .. ويامرحبا بإجازة الصيف.. والله لا يحرمنا منك
اي شيء تقدر تسويه تقضي به اليوم كامل ان جلست ساعة اسوي شي ما القى شي غيره اسويه بقية اليوم.. زي ماقلت ملل وطفش حتى النت صار مره يزهق..
